Posta ad tapa bilmirəm. Sadəcə mənasız bir istəyim…
Yeni Zelandiyaya köçmək istəyirəm. Yox yox, axı uşaqlıqdan zəhləm gedib oradan..
Əslində çox xoş, insanları insan olan bir ölkənin kiçik bir qəsəbəsinə kömək istəyirəm. Məsələn, Kanadanın çox balaca, təhlükəsiz, sərin bir bölgəsinə. Oranın insanlarının da necə insan olduğunu tam bilmirəm, amma nəisə..
Tanımadığım sadə, xoş insanlar, balaca məhlə, lazımsız söhbətlərdən uzaq.. Balaca və çox da işıqlı olmayan bir ev tutardım.. Saçımı keçəl kəsdirərdim.. Ağ və yaşıl rənglərdə geyinərdim.. Televizorum olmazdı.. Bir noutbukum olardı, onun da interneti olmazdı, arada nəsə yazmaq üçün istifadə edərdim.. Bir də 2-ci əl klassik gitara alardım.. Birdən “Volver” filmi yadıma düşdü. Əlaqəsi yoxdur amma, elə bir həyat istəmirəm))
Qaldığım məhlədə graffitilər olsun istərdim.. Mağazalardan bir az uzaq, sakit bir yer.. Qonşularımdan biri də gürcü olardı, arada meyvə çayı içməyə gələrdi. Evimdə çoxlu xəritələr asardım, arada bir neçə saat qabağında durub, ölkələrdə barmağımı sürüşdürüb, mənasız əlaqələr qurardım.. Boş və boz rəngli bir divarım olardı, ora Kandinskinin rəngləri maraqlı, özü mənasız bir şəklini asardım.. Balaca bir yerdə tort bişirmək istərdim, şirniyyat xəstəsi gülərüz insanlara bişirdiyim tortları tərifləyib satardım, qalanları da özüm yeyərdim.. Latın-amerikan rəqslərinə gedərdim bəlkə..
2 həftədən bir də maraqlı bir canlı konsertə getsəm, şəkillər çəksəm..
Bəlkə qayıdardım 7-8 ay sonra.. Yenilənmiş şəkildə.. Əslində daha yaxşı yaşamaq üçün edərdim bu səyahəti, amma bəlkə də yaşamaq daha ağır gələrdi..
Əslində mən bunları etmək istəmirəm. Yəni istəyirəm, amma eləmərəm. Çünki eləyəsi olsam, bunu yazmazdım, yazsam da, yayımlamazdım.. Deyəsən saçımı keçəl kəsdirməzdim.. Kəsdirmək istərdim, amma buna cəsarət etməmək üçün yazıram bəlkə də..
Havlayan köpek ısırmaz)
Bilirəm, çox şey istəyirəm)
